Сэлэнгэ аймгийн 17 сум, 6 тосгоны нийт 55 багийн 8781 малчин болон мал бүхий өрхөд 2015-2016 оны өвөл, хавар 1.5 сая толгой мал өвөлжиж байна. Сэлэнгэ аймгийн Жавхлант, Сант, Орхон, Орхонтуул, Сант гэсэн 5 сумын 6 өрхийн 32706 толгой мал Төв, Хэнтий, Дундговь, Дорноговь, Говь-Алтай, Архангай, Говьсүмбэр аймгийн нутагт оторлож байна. Харин 13213 мал бүхий 78 өрх өөрийн аймгийн бусад сумын нутагт, 9976 мал бүхий 43 өрх хилийн зурвас бүсэд, мөн бусад аймгаас 40109 мал бүхий 68 өрх тус тус өвөлжиж байна. Энэ жил малчид өөрсдийн хэрэгцээндээ зориулан 133.6 мянган тонн байгалийн хадлан, 28.8 мянган тонн сүрэл, 7.6 мянган тонн ногоон тэжээл, 5.6. мянган тонн үйлдвэрийн тэжээл, 8.7 мянган тонн гар тэжээл бэтгэжээ. Түүнчлэн аймгийн аюулгүйн нөөцөд 150 тонн өвс, 30 тонн тэжээл, сумдын аюулгүй нөөцөд 850 тонн өвс, 510 тонн тэжээл бэлтгэхээс өнөөдрийн байдлаар аймгийн аюулгүйн нөөцөд өнгөрсөн оны үлдэгдэл 40 тонн өвс, 12.5 тонн хүчит тэжээл, сумдын аюулгүй нөөцөд 587 тонн өвс, 90 тонн тэжээлийн нөөцтэй байгаа аж.
Энэ нь нийт өвөлжих малыг хонин толгойд шилжүүлснээр нэмэгдэл тэжээлээр 65 хоногт тэжээж хүрэлцэхүйц өвс тэжээлийн нөөц юм. Одоогийн байдлаар Сэлэнгэ аймагт мал сүрэг нэмэгдэл тэжээлд ороогүй байна. 2015-2016 оны өвөл, хавар бэлчээрт 3247 инженерийн хиицтэй болон энгийн уурхайн худаг ашиглагдах бөгөөд худгийн бэлэн байдал 96.6 хувь, өрхийн усан хангамж 99 хувьтай байгаа нь мал усаар дутагдахгүй өвөлжих боломжтой байна.
Одоо аймгийн нийт нутгаар 3-16 см зузаан цасан бүрхүүл тогтсоны дотор Түшиг, Сүхбаатар, Шаамар, Алтанбулаг, Хүдэр сум, Цагааннуур, Зүүнбүрэн, Орхонтуул сумдын хойд хэсгээр 8-16 см зузаан цастай байна. Хүйтний эрч шөнөдөө 16-25 градус, өдөртөө 8-11 градус байна.
Аймгийн нутагт дэвсгэрт цасанд хаагдсан зам даваа одоогоор байхгүй, малчин өрхийн хооронд болон бэлчээрт цас хөрлөж, шуураагүй, малын ямар нэгэн халдварт өвчин гараагүй, зүй бусын хорогдолгүй байна. Аймгийн ХХААГ-ын мал аж ахуйн тасгаас мал өвөлжилтийн талаар бүх сумдтайгаа холбоо барьж, мэдээлэл авч байна. Цаашид өвөлжилт хүндэрч болзошгүй Сайхан, Орхон, Орхонтуул, Сант сумдын малчин өрхийн байдалтай танилцаж, хүн, мал эмнэлгийн үйлчилгээг үзүүлэх арга хэмжээг авч ажиллаж байгаа ажээ.